Curso: “O Cancioneiro popular galego”, Santiago 2024

Cuarta edición do curso despois das realizadas no Conservatorio Superior de Vigo (abril 2019, febreiro 2024) e Santiago (aC Folque, marzo 2022). Podemos considerar o Cancioneiro popular galego de Dorothé Schubarth como o arquivo musical máis grande e mellor ordenado de Galicia. No curso daremos claves para aproveitarmos o mellor posible o CPG.

O curso organízao aCentral Folque e terá lugar os sábados 6 e 13 de abril de 2024, de 10 a 14h, na Sala Circular do Auditorio de Galicia (Santiago de Compostela). Matrícula: 45€. Para inscribirte fai clic aquí. Máis información, en matricula@folque.com.

Resumo

Malia ser unha das fontes máis citadas en Galicia no campo da investigación de música tradicional, o Cancioneiro popular galego é un traballo en xeral pouco comprendido e usado. No curso abordaremos esta obra imprescindible na descrición da música vocal de tradición oral en Galicia para darlle continuidade a través da busca de melodías no cancioneiro. Tes unha descrición detallada do curso na ligazón á entrada sobre o curso d’aCentral Folque

Que trataremos?

Comezaremos cunha panorámica xeral dos volumes do Cancioneiro con audición dunha escolma de exemplos. Falaremos sobre a estrutura dos volumes: apartados xerais, información sobre un volume que se completa noutro posterior etc. Achegaremos guías para a lectura das partituras, trataremos o sistema de escritura e as características da música, e prestaremos especial atención á notación das variantes. Despois da mostra duns casos iniciais, practicaremos a busca de melodías no vol. VII. Compararemos o CPG con exemplos europeos semellantes e falaremos dos ecos do CPG (recensións europeas e españolas, o traballo de Schubarth no Grupo de Estudo sobre Análise e Sistematización do International Council for Traditional Music). Resumiremos as achegas destacadas do CPG e sinalaremos algunhas tarefas por completar.

CSM Vigo, 2024. Foto: Xiana Teixeiro

CSM Vigo, 2024. Foto: Xiana Teixeiro

Na presentación dos temas achegamos numerosos exemplos, con especial atención ao apoio visual, para facilitar todo o posible a consulta e comprensión do CPG. Unha das dificultades do uso do CPG é a reunión de información relacionada que se atopa en distintos tomos e seccións da publicación (tomos que, por outra parte, son grandes e pesados!). Ao simplificar o exame dos casos escollidos vemos o traballo dun xeito distinto, máis doado de abordar.

A parte central do curso ocúpaa a busca no CPG de cántigas doutras procedencias, co que podemos completar o que sabemos sobre a difusión e variación das melodías. Por exemplo, para sabermos se entre as propias compilacións, ou noutras compilacións, se atopan sons novos, anteriormente descoñecidos, ou novas variantes de melodías raras. Entre as cántigas escollidas para este curso veremos algunhas popularizadas por Leilía, Muxicas ou Tanxugueiras, e outras recollidas por Carlos Rey para Tecnosaga, a agrupación Castro Floxo (Cancioneiro popular da provincia de Ourense) ou o Seminario Menéndez Pidal.

Se queres entrar no CPG e pensas que precisas unha guía, ou queres facelo en compañía, cantando, escoitando e avanzando paso a paso, únete a nós neste curso!

Curso: “O Cancioneiro popular galego”, Vigo 2024

Terceira edición, revisada e ampliada, deste curso despois das anteriores no propio CSM de Vigo (2019) e Santiago (aC Folque 2022).

Nesta edición afondaremos en cuestións que nos faciliten o acceso e aproveitamento desta obra como o arquivo máis grande e mellor ordenado da música de Galicia.

O curso será o venres día 23 de febreiro , de 10 a 14h (Auditorio) e de 16 a 20h (Aula de orquestra), no Conservatorio Superior de Música de Vigo (Manuel Olivié n.º 23, 36203 Vigo). Para inscribirte fai clic aquí dentro do prazo, até o 3 de febreiro de 2024 (prazas limitadas). Matrícula: 30€ (20€ alumnado do CSM Vigo). Aquí está a entrada nas RRSS do conservatorio.

Resumo

Malia ser unha das fontes máis citadas en Galicia no campo da investigación de música tradicional, o Cancioneiro popular galego é unha obra en xeral pouco comprendida e usada.

No curso abordaremos as claves para o uso desta obra imprescindible na descrición da música vocal de tradición oral en Galicia, a través da ordenación de información que aparece espallada nos seus distintos volumes e apartados; do exame detallado de exemplos propostos pola autora; da reformulación ou maior detalle na explicación de fenómenos musicais; e da comparación deste traballo con outros de características semellantes, pouco coñecidos en Galicia.

Obxectivos

—Acadar unha mellor comprensión do CPG e, por extensión, da música vocal de tradición oral en Galicia. —Aprender a manexar o CPG e a buscar información dentro del. —Comprender fenómenos propios das músicas tradicionais como a variación melódica e formal, a proxección ou transformación melódica, o libre intercambio de valores longos e breves etc. —Coñecer os xéneros que se definen por características musicais e comprender as súas definicións. —Facilitar a lectura das partituras mediante exemplos prácticos: melodía principal e variantes rítmicas e melódicas; sincronización do ritmo do canto e da percusión etc. —Comprender o sistema de ordenación de melodías e ser capaz de atopar melodías polas súas características (no vol. VII só e tamén en combinación con outros volumes).

Contidos

—A estrutura dos volumes: apartados xerais, información dun volume que se completa noutro distinto.—O sistema de escritura e as características da música. Armadura real vs armadura tonal. A escrita sen barra de compás; grupos de corcheas unidas por barra; diferenza de acentuación entre canto e percusión etc. —A notación das variantes. —Lectura das táboas sinópticas. —A descrición da música. Terminoloxía e conceptos relacionados. —O sistema de clasificación musical, a ordenación das melodías. Comparación con outros exemplos europeos, en especial húngaros (Bartók, Járdányi).

Obradoiro “Guías para o uso do Cancioneiro popular galego”

Este obradoiro forma parte da programación do V Encontro Tradición en feminino, que organiza a AGG, Asociación do baile e a música de tradición galega, o domingo 19 de novembro de 2023 no CSC do Castiñeiriño, en Santiago.

Neste obradoiro veremos algunhas claves para quitarlle proveito ao CPG. Trataremos a súa estrutura xeral para facilitar a procura de información nos distintos volumes e nos introduciremos na clasificación do vol. VII e na busca de melodías. 

O programa da xornada é o seguinte:

10.45 – Apertura

11.00 – Relatorio “O traballo de Dorothé Schubarth no Museo do Pobo Galego”. Concha Losada

11.45 – Descanso

12.00 – Obradoiro “Guías para o uso do ‘Cancioneiro popular galego’ de Dorothé Schubarth”. Sergio de la Ossa

13.30 – Xantar

16.30 – Coloquio “Dúas olladas feministas ao arquivo da oralidade musical galega” con Beatriz Busto e Xulia Feixoo

17.15 – Descanso

17.30 – Relatorio – concerto “A creación artística a través das gravacións de campo: o tránsito destas melodías ao contexto escénico”. Anaïs Barbier 

A participación é libre, ata completar o aforo, por orde de inscrición. Podes inscribirte nos teléfonos 986847074 ou 661637696 ou enviando un correo electrónico a secretaria@gaiteirosgalegos.gal, indicando nome, apelidos, un teléfono de contacto e correo electrónico.

Curso continuo de análise 2023-2024

Aquí actualizamos as novidades para este curso: constará de 13 sesións de 4 horas cada (52 horas totais). Os detalles de inscrición están aquí. O prezo da matrícula é de 350€. O curso terá lugar na Sala Circular do Auditorio de Galicia en martes (!) alternos de novembro a maio, de 10 a 14h, segundo o que ves nesta táboa:

(para descargar a táboa en tamaño máis grande, fai clic aquí)

Atención, porque agora estaremos os martes, os anos anteriores o curso tiña lugar os sábados! Isto permite asistir a quen teña libres as mañás entre semana. Se vos interesa o curso pero non podedes asistir en martes, facédeo saber á organización: estudarase ofertar en fin de semana só se hai un número suficiente de solicitudes.

Setembro 2023. Foto: Veronika Gergely

Avance: curso continuo de análise 2023-2024

Se queres preparar a proba de análise dunha canción tradicional das oposicións a mestres; se queres saber máis sobre o que cantas ou tocas; ou se recolles e investigas e precisas bases para comparar con outros repertorios ou con música histórica, en outubro comezará unha nova edición do curso de análise!

Que faremos no curso? Aprendemos escoitando gravacións orixinais, cantando e aplicando os coñecementos paso a paso, de xeito progresivo e práctico. O curso constará de 13 sesións de 4 horas cada (52 horas totais). Nel poderás preparar a proba de análise das oposicións a mestres de música.

O prezo da matrícula é de 350€ (se queres reservar praza, podes facelo aquí). O curso terá lugar na Sala Circular do Auditorio de Galicia en martes(!) alternos de outubro a maio, de 10 a 14h. O calendario definitivo publicarémolo en setembro.

Foto: Miguel Souto (O Fiadeiro, Vigo, 2016)

Por que apuntarse a este curso?

Se pensas nas oposicións: ademais de prepararte para a proba, sairás con moitos coñecementos útiles (este profesor non deixará que perdas o tempo adquirindo só o mínimo necesario para pasar unha proba: a análise e a teoría deben axudar a abrir o noso coñecemento e a gozar e saber transmitir mellor a música); cantaremos moito desde partitura e tras escoitar gravacións de campo; resaltaremos as aplicacións do que analizamos; e este ano engadiremos un pequeno repertorio de cántigas acumulativas, narrativas, canons baseados en repertorio tradicional, xogos e bailes para poñer en práctica en canto quites a praza!

Se tocas ou cantas: para saber máis sobre os xéneros musicais; para ter unha perspectiva histórica e ocasionalmente tamén comparativa entre repertorios, veremos semellanzas e diferenzas entre o repertorio galego e outros; para facerte con repertorio moi interesante e pouco trillado!

Se investigas: o modo en que se transmite a música tradicional fai que esta teña unhas características especiais, cambiantes. Achegaremos ferramentas precisas para saber valorar eses cambios na súa xusta medida, nunha extensión que completará o material troncal, para quen esteades interesados.

Se estás nalgún destes grupos pero dubidas de se é o teu curso por problemas co solfexo, dínolo. Podemos axudar tamén con iso e contribuír a que os cancioneiros e as partituras se volvan máis amigables!

Curso: «As variantes na música tradicional»

Este curso introdutorio de 4 horas de duración, organizado por aCentral Folque, terá lugar na Sala Circular do Auditorio de Galicia (Santiago de Compostela) o sábado 23 de setembro (data actualizada!) de 16 a 20h. O prezo da matrícula é de 20€ (se queres reservar praza, podes facelo aquí).

Auditorio de Galicia, 2022 (foto: Rajesh Bansal)

aCentral Folque, Auditorio de Galicia 2018 (foto: Alba María Rodríguez)

Unha das características principais do que coñecemos como tradición oral —sexa esta musical, literaria ou doutro tipo— é a variación. As melodías espállanse en formas coincidentes en xeral e diferentes en certos aspectos, ás veces secundarios, mais outras veces esenciais. Na vida dunha melodía poden darse modificacións importantes que fan que ao final dunha serie delas o orixinal resulte case irrecoñecible. Ao realizarmos comparacións con repertorio histórico ou doutras culturas debemos ter en conta as dinámicas de cambio que afectan as melodías, sobre as que operan forzas centrífugas, mais en ocasións tamén centrípetas.

Neste curso de introdución trataremos cuestións fundamentais arredor do fenómeno da variación, como os cambios de ámbito, de escala, as melodías truncadas, a adaptación a versos de distinto número de sílabas ou os conceptos máis xerais de tipo melódico e familia melódica; escoitaremos gravacións orixinais, cantaremos e comentaremos exemplos de variantes procedentes de Galicia (Cancioneiro popular galego, APOI), León (Cancionero leonés) ou Hungría (Corpus Musicae Popularis Hungaricae); e discutiremos fragmentos de escritos de D. Schubarth, L. Dobszay, I. Olsvai, S. Bayard ou W. Wiora, entre outros.

Interésache este curso se: tes curiosidade e queres coñecer de xeito máis completo a música de tradición oral; cantas ou tocas música tradicional e pensas en variar repertorio coñecido, para transformar melodías dadas seguindo procesos practicados na tradición; investigas e te cuestionas sobre o repertorio que recolliches, a súa difusión xeográfica e orixe histórica. No curso iremos máis aló da habitual análise de melodías aparentemente acabadas e autosuficientes, estenderemos o concepto de «melodía» e trataremos os procesos formais de cambio.

Romances, aninovos e Cantigas de Santa Maria

O repertorio tradicional ofrécenos de cando en vez afortunadas sorpresas. Non sempre somos quen de rastrexar a pegada das melodías vellas, por falta de paralelos nas tradicións orais ou de documentos históricos escritos; é entón cando máis necesaria se volve a análise formal, que nos permite recoñecer características que conecten entre si manifestacións xeograficamente ou historicamente afastadas.

Nesta entrada vemos un interesante trío de exemplos. Por unha banda temos dúas variantes dunha mesma melodía (a primeira, un aninovo recollido en Galicia; a segunda, un romance da Estremadura portuguesa) e por outra banda unha Cantiga de Santa Maria, que comparte tipo melódico coas anteriores e tamén escala co romance.

Para comezar podedes cantar este aninovo en modo de dó ou xónico. Aínda que estea anotada con final en sol (unha convención), podedes escoller a altura que vos sexa máis cómoda; na gravación orixinal cantaron en si. Para ver a transcrición completa ou escoitar a gravación, facede clic na seguinte partitura (ou tocade co dedo nela se estades lendo no móbil):

Aninovo recollido en Loseiro, O Incio (Lugo) ca. 1985 por Xosé Luís Rivas “Mini”

Os aninovos ou manueles cántanse no primeiro día do ano. O texto de benvida que vedes baixo a partitura é seguido dun romance relixioso (A Virxe e o cego, IGRH #226) e das coplas de despedida habituais.

Unha fermosa variante da anterior melodía, aplicada ao romance de tradición portuguesa O conde de Alemanha, aparece na publicación Tradições Musicais da Estremadura de José Alberto Sardinha (Vila Verde: Tradisom, 2000). José Ribeiro de Sousa cantou esta melodía (en modo de re ou dórico, co 6.º grao rebaixado só para o descenso do último verso) en Leiria en 1999.

Varios azares conducíronme a asociar sempre este cantar, desde hai unha década, á polifonía. Relato brevemente a historia desta creación ou adaptación colectiva, cos correspondentes créditos: un día levei este cantar á aula de música no Instituto Kodály. A sonoridade do romance lembroulle a Albert Pálinkás Berci, músico húngaro e naquel momento tamén técnico de son no Instituto, a melodía do refrán de Como poden per sas culpas, Cantiga de Santa Maria n.º 166 composta no s. XIII na corte do Rei Sabio. Atopei afortunada a súa impresión e pensei que podería funcionar ben en quodlibet, que probei axiña coa miña parella, Veronika Gergely. Vera lembroume que fixera esta CSM en canon co grupo de música medieval Sub Rosa, onde tocara e cantara. O seguinte paso foi claro: aplicar o canon ao romance portugués; e o último paso tamén caía por si só: facer en dobre canon o Conde de Alemanha e mais a CSM n.º 166. Así é como me acompañan estas melodías en moitos dos cursos dos últimos anos.

Unha nova e moi feliz sorpresa viría cando en 2019 María Giménez, do conxunto Manseliña, adaptaba a variante portuguesa da melodía ao poema Ũa moça namorada de Lourenço, xograr do s. XIII, e gravou este fermoso vídeo xunto a Tin Novio na igrexa de San Domingos de Bonaval, en Santiago de Compostela. María Giménez canta e toca a fídula oval e Tin Novio toca o laúde medieval (ambos os dous instrumentos réplicas dos representados no Pórtico da Gloria). A adaptación é sutil e creativa, coa imitación parcial do laúde durante o canto que soa espontánea e non distrae do que é principal nese momento; coa música das estrofas da CSM nos interludios instrumentais que achega variedade e coa case imperceptible inclusión dalgún xiro proveniente da CSM na melodía desta versión do Conde de Alemanha. Non podería imaxinar máis artística e tamén natural adaptación para estas músicas e letra. A toma de son, a realización de vídeo e a acertada escolla do lugar para a interpretación non fan senón realzar un resultado espléndido.

Que ledicia ver como as músicas que un leva aos cursos estenden a súa vida e botan raíces sexa noutras aulas, sexa en escenarios ou en gravacións coma esta! Síntome afortunado polo alumnado que asiste aos cursos de análise ou de didáctica da musica tradicional. Moitas veces, polo placer de facer música con persoas que traen consigo unha rica bagaxe musical e que arriban ao curso sexa por intereses académicos, por coñecer outro tipo de repertorio ou na procura de conexións con repertorio histórico ou con repertorios doutras culturas, na procura de ritmos ou de escalas pouco comúns.

Un imperativo para o ensino que asumo con pracer é o de escoller a mellor música posible, seleccionala con agarimo e con gusto, pois será a música que vivamos no día a día; música que ilumine e enriqueza a vida cotiá, nunca vulgar, gris ou robótica.

— — — — —

P.D.#1: Manseliña vén de publicar o seu segundo CD, María Pérez se maenfestou, cantigas de escarnio a María Balteira, e está a preparar unha nova gravación. Combinan con moito acerto música medieval e música tradicional, non perdades de vista o seu traballo!

P.D.#2: Os perfís melódicos do aninovo e mais do romance portugués tédelos comparados en A Basic Guide to Folksong Analysis (2019), onde aparecen ambas as dúas partituras. (Lembrade que o acceso á publicación online é gratuíto, previo rexistro; tedes máis info aquí.)

Curso continuo de análise 2022-2023

Este ano, o curso continuo de análise trae dous compañeiros: un obradoiro previo de lectura cantada de partituras, de 6h de duración, e un curso complementario de 12h de duración sobre características que non tratei en anos anteriores: variación, entoación non temperada, análise comparada…

cursos 2017-2020 / fotografías: Ramon Almuinha, Alba María Rodríguez e propias

Que facemos no curso? Aprendemos escoitando gravacións orixinais, cantando (moito) desde partitura e aplicando os coñecementos paso a paso, de xeito progresivo e práctico. Parto da experiencia dos cursos que iniciei no Instituto de Pedagoxía Musical Kodály, en Hungría, e na dos xa numerosos cursos realizados n’aCentral Folque e noutros centros e conservatorios en Galicia nos últimos dez anos para aplicar melloras en cada nova edición. Este ano o curso constará de 13 sesións de 4 horas cada (52 horas totais). Nel poderás preparar a proba de análise das oposicións a mestres de música.

O prezo da matrícula para o curso de análise é de 350€ (se queres reservar praza, podes facelo aquí). Se ademais che interesa asistir ao obradoiro previo ou ao curso complementario, a matrícula terá descontos, que podes consultar aquí. O curso terá lugar na Sala Circular do Auditorio de Galicia os sábados indicados no plan, do 29 de outubro ao 13 de maio, de 10 a 14h, segundo o que ves nesta táboa:

(para descargar a táboa en tamaño máis grande, fai clic aquí)

Como traballamos a análise? Podes ver parte do método noutras páxinas e entradas deste blogue (por exemplo, aquí). Tes algo máis completo na versión publicada no KodályHub da miña guía de análise (+ info nesta entrada). Se tes algunha pregunta sobre o curso, escribe ao enderezo de contacto desta páxina. Se as dúbidas son sobre cuestións administrativas ou matrícula, escribe a matrícula@folque.com.

Podes ler aquí un resumo dos contidos do obradoiro previo e do curso complementario. Esperamos que che interese, agardamos por ti no grupo deste curso!

Obradoiro de lectura de partituras

(6h de duración; sábados 1, 8 e 15 de outubro de 11 a 13h, no Auditorio de Galicia)

O obradoiro está dirixido a persoas matriculadas no curso continuo de análise. Acostuma haber persoas interesadas no curso mais con pouca formación académica, e tamén persoas con formación académica mais que non acadaron destreza na lectura cantada de partituras (é dicir: que non escoitan internamente como soa unha melodía ao vela en partitura). Se che interesa o curso de análise pero pensas que non vas ter tempo para asimilar as aprox. 200 partituras que veremos, ou se tes destrezas básicas de lectura e queres mellorar e axilizar a tarefa de facerte coa música, de interiorizala, recomendo que te apuntes a este obradoiro previo.

Curso complementario de análise

(12h de duración; sábados 25 de febreiro e 11 e 25 de marzo, de 16:30 a 20:30, no Auditorio de Galicia)

Neste curso trataremos características cambiantes das melodías. A música é tamén proceso, observable por exemplo no fenómeno da variación melódica como un tipo de improvisación: cómo unha persoa cambia unha melodía ao longo dunha mesma execución ou ao longo de varias execucións? como cambian as melodías executadas por distintas persoas, en distintos momentos e lugares? Veremos exemplos de heterofonía, entendida como as variantes que se executan simultaneamente, e escoitaremos e cantaremos exemplos de música tradicional de Galicia e tamén do revival folk de Hungría ou Irlanda. Veremos cómo nas variantes dunha mesma melodía cambian a afinación, a escala, o número de sílabas dos versos, cómo cambian o compás, o modo de execución (tempo giusto ou rubato) ou mesmo o número de versos e a forma até facer unha melodía case irrecoñecible, e trataremos, sempre con exemplos, o concepto de «tipo melódico». Afastamos o foco da análise para achegarnos á panorámica e á comprensión xeral do repertorio.

A música tradicional nas obras de Bartók

En setembro de 2020 viu a luz no sitio da Academia Húngara das Ciencias (www.zti.hu) esta fenomenal base de datos, que fai máis accesible e tamén expande a monografía orixinal do mesmo título de Vera Lampert. Publicada en húngaro en 1980 (e revisada en 2005), editouse tamén en alemán en 1982 e en inglés no 2008.

Portada e contraportada da edición en inglés (2008)

Na base de datos dispoñemos de gravacións de audio das recollas orixinais (cando as hai); de gravacións de Bartók mesmo ou de fragmentos de rexistros de Zoltán Kocsis ao piano; das transcricións orixinais de Bartók en facsímile e das versións finais das melodías tal e como apareceron nas súas obras. Ademais das ferramentas de exploración e de busca avanzada, inclúese a introdución orixinal da monografía de Vera Lampert e mais un mapa. A edición está a cargo de Márton Kerékfy e de Viola Biró.

Podemos consultar a base de datos en inglés (http://bartok-nepzene.zti.hu/en) e mais en húngaro. Velaquí a nova da publicación da base de datos en inglés, con máis detalles: https://zti.hu/index.php/en/ba/events/849-new-database-folk-music-in-bartok-s-compositions

Anímovos a consultar algunha das obras e fontes xa dispoñibles desta base de datos aínda en construción. Por exemplo, un movemento dunha das obras máis interpretadas e coñecidas de Bartók, as Danzas populares romanesas.

Clicando na pestana “BROWSE” (“EXPLORAR”), e despois á esquerda en “Piano works” (“obras para piano”) atoparedes a obra. Clicando no título dela aparecerán os seus distintos movementos. Clicamos en “Stick dance” (Jocul cu bâtă):

Debaixo da partitura coa melodía (tal e como esta aparece na versión da obra para piano), vemos un reprodutor coa gravación de campo da melodía, e tamén os datos dispoñibles sobre ela. Debaixo dos datos da recolla temos distintas fontes da notación:

Abro, por exemplo, a fonte (D), que corresponde ao n.º 425 de RFM/I e . Se abrimos a pestana “SOURCES&ABBREVIATIONS” (“Fontes e abreviaturas”), saberemos que corresponde a

RFM/I–III

Béla Bartók, Rumanian Folk Music, vol. I: Instrumental Melodies, vol. II: Vocal Melodies, vol. III: Texts, ed. Benjamin Suchoff. The Hague: Martinus Nijhoff, 1967.

Na pestana “Audio Recording and Score” (“Gravación de audio e partitura”) podemos escoitar un fragmento da gravación de Zoltán Kocsis ao piano para Hungaroton, e mais a gravación do propio Bartók editada polo mesmo selo:

Na pestana “Comparison” temos as diferentes versións da notación da melodía visibles unhas xunta as outras:

Comprobamos aquí diferenzas máis ou menos sutís entre a melodía que coñecemos polas interpretacións habituais (ou pola partitura) e a transcrición da gravación; diferenzas apreciables tamén na gravación, e que poden suxerirnos unha execución rítmica máis aberta e máis fiel ao estilo orixinal.

Así se ve o mapa cos lugares onde gravou Bartók dentro das fronteiras da Hungría anterior a 1920. Clicando nas localidades accederemos ás melodías rexistradas e ás obras creadas por Bartók a partir delas. Neste caso, vemos a localidade en que Bartók recolleu esta melodía:

Alégrome de que se fagan realidade iniciativas coma esta, que nos achegan á creación musical e á música tradicional e que nos facilitan o acceso ás fontes, con estudos coidados sobre elas. Tanto se vos interesa a música tradicional, en xeral, como se tocades obras de Bartók inspiradas nela, sen dúbida será obrigada a visita a este sitio. Nunca sobran as ocasións para coñecer máis e mellor a este músico marabilloso e á marabillosa música dos pobos da conca dos Cárpatos (e de alén deles) que el amou, que loitou por dignificar e que quixo compartir con todos nós!

Taller de transcrición — Salamanca, COSCYL

No marco das Jornadas de Investigación Musical — Etnomusicología, que se celebran o 3 e 4 de maio en Salamanca, no Conservatorio Superior de Música de Castilla y León, impartirei un taller de transcrición o martes 3 ás 18:15. Taballaremos en especial a transcrición de variantes estróficas.

As xornadas contan cun programa ben interesante, que podedes consultar no código QR desta ligazón.

Moi agradecido a Julia Andrés Oliveira pola chamada e con ganas xa de estar alí!